You Are Here: Home » Whats New » WIZARA KUMUENZI MWL.NYERERE KIMKAKATI

WIZARA KUMUENZI MWL.NYERERE KIMKAKATI

Wizara ya Maliasili na Utalii kupitia Taasisi zake imejipanga kumuenzi Mwalimu Nyerere kwa kukikarabati na kukiendesha Kituo cha Makumbusho ya Mwl. Nyerere, kwenye makazi ya Baba wa Taifa wilayani Butiama mkoani Mara.


Hatua hiyo inalenga kukiboresha kituo hicho kuwa cha kisasa ili kiweze kuwavutia watalii wengi zaidi kutoka ndani na nje ya nchi.

Akizungumza mara baada ya kutembelea kituo hicho wilayani Butiama mkoani Mara,  Constantine Kanyasu amesema Makumbusho hiyo ni hazina ya Taifa kutokana na uwepo wa mikusanyo na historia iliyobeba taswira ya Taifa la Tanzania kabla na baada ya Uhuru.

Amesema yeye akiwa Naibu Waziri atahakikisha Makumbusho hiyo inatengewa bajeti ya kutosha ili kuiwezesha kuwa ya kisasa na yenye kuwavutia watalii.

Ameeleza kuwa nchi mbalimbali duniani ikiwemo China zimekuwa zikiingiza fedha nyingi kupitia Makumbusho za viongozi ambao walikuwa waasisi wa nchi hizo kama alivyokuwa Mwl.Nyerere.

Amesema sifa aliyokuwa nayo Mwl. Julius Kambarage Nyerere lazima iakisi Makumbusho yake kwa kuwa bora na yenye kuwavutia watalii.

Makumbusho hiyo lazima iwekewe mazingira mazuri ili iakisi utu na uzalendo wake kwa taifa la Tanzania.

Aidha, Kanyasu amesema Makumbusho hiyo itafanyiwa utaratibu wa kuwa na watumishi wa kutosha wa kuihudumia.

Kwa upande wake, Mkurugenzi wa Makumbusho hiyo, Emamuel Kiondo amemweleza Naibu Waziri huyo kuwa kituo hicho kina watumishi wawili pekee walioajiriwa na wengine wakiwa watumishi wa kujitolea.

Aidha, ameeleza kuwa kituo hicho kinakabiliwa na changamoto mbalimbali ikiwemo ya uhaba wa vitendea kazi. 

 

 

© 2019 - Ministry of Natural Resources and Tourism Tanzania

Scroll To Top